निधर्मी मैत्री

आठवा कधी तुम्ही मैत्री करताना

जात धर्म पाहिला आहे,

परधर्माच्या मित्रांसाठी

नक्कीच स्वधर्मीयांना भांडला आहे

अतूट होती मैत्री तुमची

मनापासून, हृदयापासून,

क्षणालाही करमत नव्हते

तुम्हाला एकमेकांपासून

जात वेगळी, धर्म वेगळे

पक्ष वेगळे, रंग वेगळे,

तरीही जगत होता रे तुम्ही

जिवलग मित्र बनून सगळे

राज्यकर्त्यांना बघवत नाही

मैत्री तुमची अशी अतूट,

पोळी भाजत नाही त्यांची

पाहूनी तुमची एकजूट

कावा त्यांचा ओळखा तुम्ही

बनू नका धर्मांध असे रे,

सत्तेसाठी धडपड त्यांची

तुमचे कुणाला भान नसे रे

सद्सद्विवेक बुद्धी जागवून

विचार स्वतःच करा नेटका,

एकसंघ राहूनी सगळे

द्या दुष्ट शक्तींना झटका

जात पंथ अन् धर्म विसरूनी

भारतीय तुम्ही बना आता रे,

माणुसकीला धर्म मानूनी

सुंदर बनवा या जगता रे...

✒ K. Satish

प्राण गुंतला तुझ्यात गं

का जाने कुणास ठाऊक

तुझे नि माझे नाते कसले,

भेटीसाठी तुझिया माझे

मन हे आतुर होऊन बसले

तुझ्याविना मी काहीच नाही

जीव गुंतला तुझ्यात माझा,

आस मनाला तुझी सदैव

ध्यास जीवाला लागला तुझा

हरवून गेलो तुझ्यात मी गं

भान मला ना आता कसले,

मीच न उरलो माझा आता

प्राण हे माझे तुझ्यात वसले

जाऊ नकोस दूर तू आता

मन हे माझे मोडू नको,

आयुष्याच्या वाटेवरती

एकटे मला तू सोडू नको

तुझ्याविना जग शून्य हे भासे

जिथे पहावे तूच तू दिसे,

तुझ्याविना जगणे हे आता

माझ्यासाठी व्यर्थच असे...

✒ K. Satish

वंदन तथागतांना

मानवता अन् विज्ञानाचा

थोर असा संदेश तयांचा,

मार्ग दाविला अहिंसेचा

उद्धार केला सकलजनांचा

मूळ शोधले दुःखाचे अन्

ते निवारण्याचा मार्ग शोधला,

रक्तपात अन् संहाराचा

दुष्ट पापी विचार भेदला

तथागतांच्या शिकवणीची

आपण सगळे कास धरूया,

बुद्ध पौर्णिमेला सगळे

नमूनी तयांना वंदन करूया...!!!

बुद्धं शरणं गच्छामि

धम्मं शरणं गच्छामि

संघं शरणं गच्छामि

सर्व भारतीयांना

वैशाख बुद्धपौर्णिमेच्या

      मनःपूर्वक शुभेच्छा...!!!

✒ K. Satish

अद्वितीय छत्रपती संभाजी महाराज

शूरवीर अन् महाप्रतापी

छत्रपतींचे छावे,

अद्वितीय असे कार्य की

सार्‍यांनी नतमस्तक व्हावे

स्वराज्याचे द्वितीय छत्रपती

शिवरायांची सावली ते,

प्रजाजनांची आशा आणिक

स्वराज्याची भाषा ते

मैत्री त्यांची अमूल्य होती

ज्ञानही होते त्यांचे अपार,

स्वराज्यद्रोह आणि फितुरी

करणार्‍यांना केले ठार

लाज राखिली स्त्रियांची अन्

मान राखिला धर्माचा,

मृत्यू आला तो ही लाजला

असा थाट महाराजांचा

असा थाट महाराजांचा...

✒ K. Satish

खोटी प्रतिष्ठा

वाढदिवस श्रीमंताच्या मुलाचा

धुमधडाक्यात झाला साजरा,

लाखो रुपयांच्या सजावटीकडे

उपस्थितांच्या लागल्या नजरा

आमदार आले, खासदार आले

सगेसोयरे झाडून आले,

नेत्रदीपक रोषणाईने

डोळे त्यांचे दिपून गेले

मनोरंजनाचा खजिनादेखील

सर्वांसाठी तयार होता,

संगीत, नृत्य, ऑर्केस्ट्रासोबत

फटाक्यांचा धुमधडाका होता

ठिकठिकाणी अवतरली होती

जत्रा खाद्यपदार्थांची,

काय खावे अन् काय न खावे

पंचाईत झाली लोकांची

ज्याच्यासाठी सोहळा होता

तो हिरा कुठे दिसतच नव्हता,

एक वर्षाचा राजकुमार तो

केव्हाच झोपी गेला होता

खरे म्हणजे अशा सोहळ्यांचे

महत्त्व अनेकांना माहीत नसते,

निमित्त यांचे साधून त्यांना

स्वतःची प्रतिष्ठा मिरवायची असते

खोट्या अशा प्रतिष्ठेपायी

नाहक पैशांचा अपव्यय होतो,

याच पैशाची चणचण भासून

गरीब शेतकरी यमसदनाला जातो

समाजासाठी या पैशाचा

सुयोग्य वापर करून पहावे,

दीनदुबळ्यांचे अश्रू पुसूनी

आनंदामध्ये न्हावून जावे

खोट्या प्रतिष्ठेला महत्व द्यावे

की, महत्व द्यावे सत्कार्याला,

एकदा तरी विचारून पहावे

स्वतःच स्वतःच्या मनाला

✒ K. Satish

आई

माया आणि ममता आई

प्रेम आणि करूणा आई,

स्नेहभाव तो तिच्यासारखा

कोणाच्याच हृदयामध्ये नाही 

चिमटा काढून पोटाला ती

घास भरवते पिल्लांना,

दुःख मागते स्वतःसाठी अन्

सुखी बनवते इतरांना 

भलेभले ते होते अगदी

नतमस्तक तिच्या चरणी,

काळीज तुटते मनातूनी पण

ओरडे मुलांना वरकरणी 

महिमा तिचा या जगी हो मोठा

किती गावे तिचे गुणगान,

त्यागाची अतिसुंदर मूर्ती

आई या सृष्टीची हो शान

✒ K. Satish

राजर्षी छत्रपती शाहूमहाराज

🙏🏻 विनम्र अभिवादन 🙏🏻

वसा घेतला समाजसुधारणेचा

ठाव घेतला बहुजनांच्या मनाचा

प्रतिकार केला दुष्ट जातीभेदाचा

अभिमान वाटतो महान आमच्या राजाचा

शिक्षणाचे महत्त्व जाणूनी त्यांनी

बहुजनांना शिक्षित केले

अज्ञानाच्या काळ्या छायेतूनी

ज्ञानाच्या प्रकाशाकडे नेले

शेतीला दिले सर्वोच्च प्राधान्य

दीनदुबळ्यांची दूर केली लाचारी

रयतेचे शोभतात राजे खरे

बहुजनांचे खरे कैवारी...!!!

तळागाळातील लोकांसाठी लढणाऱ्या,

बहुजनांना ज्ञानाचा अधिकार मिळवून देणाऱ्या,

अंधश्रद्धा आणि जातीभेदावर कडाडून प्रहार करणार्‍या,

शेतीला सुजलाम् - सुफलाम् करण्यासाठी विविध उपाययोजना राबवणार्‍या

अशा या रयतेच्या महान राजाला

राजर्षी छत्रपती शाहू महाराजांना त्यांच्या स्मृतीदिनानिमित्त विनम्र अभिवादन...!!!

✒ K. Satish

कामगार देशाची शान

आर्थिक योद्धे देशाचे आम्ही

देशाची हो शान,

उद्योगाचा पाया आम्ही

उद्योगाचा मान

क्षेत्र असो मग कोणतेही आम्ही

भीत नाही हो कष्टाला,

अर्थशास्त्राचा कणा आम्ही

संकटात तारतो देशाला

घरघर घरघर यंत्र चालवीत

चक्र फिरवतो प्रगतीचे,

कामे करतो सर्वतर्‍हेचे

कष्टाचे नि बुद्धीचे

संकटकाळी कोरोनाच्या

जगणे होते अवघड हो,

भय होते जीवाचे तरीही

ना टाळले कामाला हो

प्रगतीपथी नेण्या देशाला

करू आम्ही जीवाचे रान,

कामगार देशाची संपत्ती

देश आमचा जीव की प्राण

✒ K. Satish

महाराष्ट्र

महापुरूषांची भूमी आमुची

आहे तिचा आम्हा अभिमान,

निष्ठा आमची सदा तिच्यावरी

तीच आमचे जीव की प्राण

स्वर्गसुख या मातीमध्ये

अगाध खजिना संस्कारांचा,

या भूमीमध्ये जन्म जाहला

अंतही व्हावा इथेच आमुचा

माय मराठी भाषा आमुची

मान सर्व भाषांचा ठेवतो,

आम्ही शिकतो इतरही भाषा

इतरांनाही मराठी शिकवतो

कितीही आली संकटे तरीही

एकजुटीने लढतो आम्ही,

देशासाठी लढणारांची

भासे कधी ना येथे कमी

महाराष्ट्राचा डंका वाजे

चारी दिशांमध्ये नाव हे गाजे,

महान अशा या राज्याला हो

'महाराष्ट्र' हे नावच साजे

✒ K. Satish

घुमावा मंगलमयी सूर

तरणंबांड गडी आम्ही मर्द हो

लग्नासाठी आतुर,

पण कोरोनानं केलंया आमचं

जगणं थातूरमातूर

तिशी गाठत आलो आम्ही

तरूणपणानं जाताना,

कंटाळा आला जगण्याचा

रोजगार सापडताना

कशीबशी आता लागली नोकरी

गवसला जगण्याचा सूर

पण कोरोनानं केलंया आमचं

जगणं थातूरमातूर

किती आशेनं ठरवलं होतं

लग्न आता हो करायचं,

सुशील मुलगी पाहून तिला

घरी हो आपल्या आणायचं

विचार करतच होतो अचानक

मध्येच आला हा असूर,

अन् कोरोनानं केलंया आमचं

जगणं थातूरमातूर

आज उद्या संपेल हे संकट

जग आशेवर जगतंय,

गोंधळात या पण हो आमचं

वय हे पुढं सरकतंय

नोकरी अन् छोकरीसाठी आम्ही

होतोय हो चिंतातूर,

अन् कोरोनानं केलंया आमचं

जगणं थातूरमातूर

करतो प्रार्थना संपावी

लवकर हो ही महामारी,

त्रासून गेलीय या महामारीला

हो जनता सारी

बिनलग्नाचे मरण न येवो

लागली जीवाला हुरहूर,

संकट संपूनी जीवनात या

घुमावा मंगलमयी सूर

✒ K. Satish