घुमावा मंगलमयी सूर

तरणंबांड गडी आम्ही मर्द हो

लग्नासाठी आतुर,

पण कोरोनानं केलंया आमचं

जगणं थातूरमातूर

तिशी गाठत आलो आम्ही

तरूणपणानं जाताना,

कंटाळा आला जगण्याचा

रोजगार सापडताना

कशीबशी आता लागली नोकरी

गवसला जगण्याचा सूर

पण कोरोनानं केलंया आमचं

जगणं थातूरमातूर

किती आशेनं ठरवलं होतं

लग्न आता हो करायचं,

सुशील मुलगी पाहून तिला

घरी हो आपल्या आणायचं

विचार करतच होतो अचानक

मध्येच आला हा असूर,

अन् कोरोनानं केलंया आमचं

जगणं थातूरमातूर

आज उद्या संपेल हे संकट

जग आशेवर जगतंय,

गोंधळात या पण हो आमचं

वय हे पुढं सरकतंय

नोकरी अन् छोकरीसाठी आम्ही

होतोय हो चिंतातूर,

अन् कोरोनानं केलंया आमचं

जगणं थातूरमातूर

करतो प्रार्थना संपावी

लवकर हो ही महामारी,

त्रासून गेलीय या महामारीला

हो जनता सारी

बिनलग्नाचे मरण न येवो

लागली जीवाला हुरहूर,

संकट संपूनी जीवनात या

घुमावा मंगलमयी सूर

✒ K. Satish

सत्य जीवनाचे

मृत्यूचे तांडव चोहीकडे

जेव्हा वाढले होते,

मोहमायेच्या दुनियेतूनी

लोक बाहेर पडले होते

हळूहळू निवळता

संकटाची ती छाया,

पुन्हा आठवू लागली

साऱ्यांना मोहमाया

पुन्हा सुरू जाहला

पैशाचा पाठलाग,

हव्यास वाढला पुन्हा

अनीतीला आली जाग

कळेचना कसे हो

आहे कशातं सुखं,

आहे हातातं लाखो

पण हजाराचे दुःख

आहे अटळ तो मृत्यू

हे सत्य जीवनाचे,

सोडूनी इथेच सारे

साऱ्यांना हो जायाचे

मोहमाया शून्य आहे

हे मनी रूजवावे,

जे जवळ आहे त्यातूनी

स्वर्गसुख अनुभवावे

रिक्त हाताने जाणारे

एक प्रेत रोज पहावे,

अहंकारी त्या मनाला

हे सत्य दाखवावे

✒ K. Satish

गणित चुकांचे

चूक झाली जर कागदावरती

खोडून फाडून टाकता येते,

आयुष्यातील चुकांनी मात्र

अवघे जीवन बदलूनी जाते

ना चुकेल तो माणूस कसला

कोणी नाही जो कधी ना फसला,

मूर्ख म्हणावे त्याला जो की

चुकांनाच कवटाळूनी बसला

आयुष्याचे गणितच हे की

चूक छोटी पण अनुभव मोठा,

ज्याने घेतला बोध चुकांतूनी

त्याला यशाचा पडे ना तोटा

अडखळला जो चुकांच्यामधे

बदल त्याने ना काही घडविला,

चुकांमधूनी जो सुधारला

प्रगतीपथावर धावत गेला

आयुष्यातील चुकाच देती

अनुभवाचे अनेक मोके,

अनुभवातूनी माणूस घडतो

गणित चुकांचे असे अनोखे

✒ K. Satish

जागतिक काव्यदिनाच्या शुभेच्छा

कळले नाही मला 

हे शब्द कसे आले,

लिहीत गेलो हळूहळू

आणि काव्य पूर्ण झाले.

शांतपणे बसता 

डोळे मिटून गेले,

स्मृतीमधील काही

जुने क्षण जागे झाले.

आठवूनी त्यांना 

मग शब्दधागा विणला,

अशाप्रकारे माझा 

कवितासंग्रह बनला.

जागतिक काव्यदिनाच्या

सर्व कवी, साहित्यिक व काव्यरसिकांना मनःपूर्वक शुभेच्छा...!!!

✒ K. Satish

भविष्य

तळहाताच्या रेषा अन् चेहरे पाहून 

बरेचजण भविष्य सांगतात,

ते सांगण्यासाठी लोकांकडून

पैसे देखील मागतात

चांगले सांगता सांगता

थोडी अडचणींची झालर दिली जाते,

मग धास्तावलेल्या मनामध्ये

उपायांची आसही जागवली जाते

चांगले व्हावे या आशेने लोक

अंधश्रध्देच्या मागे धावतात,

अन् हतबल झालेले हे लोक

आपसूक त्यांच्या जाळ्यात घावतात

सर्व चांगले व्हावे म्हणून

अनेक उपाय सुचवले जातात,

अन् भांबावलेल्या लोकांकडून

बक्कळ पैसे उकळले जातात

अडीअडचणी, दुःख - वेदना

मानवी जीवनाचा भागच आहे,

 तळहाताच्या रेषा निराळ्या

तरी कोण यातून सुटला आहे ?

मनगटामध्ये जोर असावा

अन् इच्छाशक्तीही प्रबळ असावी,

या दोन्हींच्या जोरावर

भविष्य घडविण्याची ताकद असावी...!!!

✒ K. Satish

माझे जगणे

साथ देऊनी आयुष्याला

आनंदाने जगतो आहे,

आली संकटे कितीही तरी मी

त्यांना पुरून उरतो आहे

घडलेल्या वाईट घटनांचा

शोक करीत बसण्यापरी मी,

अनुभव संपन्न झाल्याचा

पुरता आनंद लुटतो आहे

चिंतेने चितेवर जाण्यापेक्षा

चिंतेलाच अग्नी देतो आहे,

आयुष्य आहे सुंदर त्याला

अतिसुंदर मी बनवतो आहे

जे आहे मजपाशी ते तर

सोडूनी इथेच जायचे आहे,

झरा बनूनी ज्ञानाचा मज

ओसंडूनी वाहायचे आहे

✒ K. Satish

जागतिक महिला दिन

धकाधकीच्या जीवनात जर का तुम्हाला

बनायचे असेल सशक्त महिला,

तर मग रूसण्या-फुगण्याच्या बाबतीत

ठेवू नका तुमचा नंबर पहिला

मनगटातील जोराच्या बाबतीत

पुरूष भलेही असतील तुमच्यापेक्षा वरचढ,

पण सहनशक्तीच्या बाबतीत मात्र

नेहमी तुमचेच पारडे असते जड

मुलांना प्रेम द्या

तुमच्या प्रेमळ मातृत्वाने,

स्वतःला सिद्ध करा

तुमच्या अभूतपूर्व कर्तृत्वाने

संसार सांभाळता सांभाळता 

दाखवून द्या तुमची चमक,

 सर्वांनाच कळू द्या, बाहेरील जगाला तोंड देण्याची

तुमच्यामध्ये सुद्धा आहे धमक...!!!

✒ K. Satish

अतिहाव अधोगतीकडे धाव

खातच गेले खातच गेले

खाऊन खाऊन फुटू लागले,

फुटूनी झाले तुकडे तरीही

अजून खायचे बोलू लागले

भ्रष्टाचारी मन हे असले

अंत न यांच्या स्वार्थाला,

पैसा खाती अतोनात तरी

समाधान ना मिळे मनाला

जीवन आहे एकच तरीही

पैसा हवा हो यांना अगणित,

फुकटचा मिळे ज्यावेळी तेव्हा

होतो आनंद यांचा द्विगुणित

पैसा पैसा करता करता

वय ते यांचे सरून गेले,

वार्धक्याच्या उंबरठ्यावरी

यांना उमजेना काय कमाविले

कमी जास्त त्या प्रमाणात हो

सर्वच जण कमावती पैसा,

सर्वांपेक्षा जास्त हवा मज

मनी का यावा हव्यास ऐसा

माणसासाठी पैसा आहे

पैशासाठी माणूस नाही,

प्रमाणात हो हवाच पैसा

अतिहाव कामाची नाही

✒ K. Satish

अभिमान मराठीचा ?

व्हाॅटस्ॲपवरती आज

असंख्य मेसेज साचले,

कित्येक मेसेजमधून मी

मराठीचे गुणगान वाचले

मराठीचे गुणगान गाताना

थोडातरी विचार प्रत्येकाने करावा,

स्वतःबरोबरच भावी पिढीलाही

मराठीची गोडी लावण्याचा ध्यास धरावा

इंग्रजी माध्यमांमध्ये

पुढची पिढी शिकतेय,

मराठी बोलताना सहजतेने

त्यांची जीभ कुठं वळतेय ?

आंतरराष्ट्रीय स्तरावर आता

इंग्रजीला नाही उरला पर्याय,

म्हणूनच म्हणतो फक्त एकाच दिवशी

मराठीचा अभिमान बाळगणे पुरेसे होईल काय ?

काळाची गरज म्हणून मुलांना

इंग्रजीमध्ये जरूर शिकवावे,

पण नित्यनेमाने दररोज त्यांना

मराठी साहित्य जरूर पुरवावे

सुंदरतेने नटली आहे

आपली मराठी भाषा,

भावी पिढीच्या मनी रूजेल

हीच बाळगू आशा...!!!

✒ K.Satish

आस तुझिया प्रितीची

नभ बरसला अन्

भिजवून गेला मातीला,

सुगंधित झाली माती जणूकाही

स्वर्गच आला भेटीला

मन हे माझे सुखावले अन्

तुझी आठवण मनी जागली,

याच क्षणी तुला भेटायाची

तीव्र आस या जीवा लागली

जरी भेटली नाहीस तू तरी

स्वप्नात माझ्या येशील का ?

कोमल तुझ्या त्या हाताला तू

हातात माझ्या देशील का ?

प्रीत माझिया मनातली सखे

तुझिया मनाला कळेल का ?

तुझ्या प्रितीची साथ ही मजला

या जन्मामध्ये मिळेल का ?

✒ K. Satish