लचके सह्याद्रीचे

विकासाच्या नावावर झाडे तोडू लागले,

निसर्गाशी खेळून षडयंत्र घडू लागले

पैशाचा - हुकूमशाहीचा खेळ करूनी

अभेद्य सह्याद्रीचे लचके तोडू लागले

लोकांसाठी चालवलेले लोकशाहीचे राज्य,

पाऊल त्याचे हुकूमशाहीकडे पडू लागले

जनतेला गुलाम बनवण्याचे ध्येय बाळगूनी,

इथल्या राजकारण्यांचे मेंदू सडू लागले

जनतेच्या पैशावर सुरक्षित हे सगळे,

जनतेला मरणाच्या दारात सोडू लागले

जे प्रकल्प जगभरात प्रतिबंधित केले ते

माझ्या या देशात सर्वत्र उघडू लागले

महागाईने त्रस्त इथला हरएक नागरिक

अन्न - पाण्यावाचून मुडदे पडू लागले

एकीकडे पाणी टंचाईचे घोर संकट अन्

दुसरीकडे जंगलच्या जंगल तोडू लागले

सावरा रे वेड्यांनो पैशाच्या मोहातून

निसर्गाचे नियम तुम्ही का मोडू लागले

मरण अटळ आहे हे ना तुम्हालाही चुकणार

मग स्वतःच्याच पायावर का धोंडे पाडू लागले

पाणी म्हणजे जीवन, पाण्यासाठी हवीत झाडे,

पैशाच्या बाजारात माणूस व्हा थोडे

भावी पिढ्यांचा विचार कराल तुम्ही तेव्हाच

उलगडेल नक्कीच या प्रश्नाचे कोडे

उलगडेल नक्कीच या प्रश्नाचे कोडे

✒️ K. Satish

नव्या दमाची नवी पिढी

नव्या दमाची नवी पिढी ही

झुकणे नाही ध्यानीमनी,

हुकूमशाहीने दाबू नका तिला

पाजेल तुम्हास ती पानी

अजूनही आहे वेळ हाताशी

देश हा त्यांचा आहे हो,

भेदभावाचे विष त्यांच्या मनी

पेरणे तुम्ही थांबवा हो

आशा झाल्या आज पल्लवित

पाहूनी हिम्मत तरुणाईची,

अशीच एकजूट अखंड ठेवूनी

रक्षा करावी लोकशाहीची

जनतेमध्ये फूट पाडणे

कठीण होऊन बसले हो,

पहिला विजय या तरूणाईचा

पाहून अंतर्मन हसले हो

हा तर तुमचा आरंभ आहे

इथून करूया नवी सुरूवात,

धडकी भरवू हुकूमशाहीला

भ्रष्ट व्यवस्थेवर करू आघात

✒️ K. Satish

अनुभव - सर्वश्रेष्ठ गुरू

संकटकाळी साथ सोडली

त्यांना दूर करावे

त्याही काळी सोबत राहिले

त्यांना नित्य जपावे

भरभराट असताना जो तो

मागे पुढे घुटमळतो 

गणित बिघडले थोडे तर मग

तोच तुम्हाला छळतो

बनावटी या दुनियेमध्ये

जिवलग असती थोडे

बाकी सगळे स्वार्थासाठी

मागे फिरणारे घोडे

त्या घोड्यांच्या गर्दीमधूनी

थोडे बाजूला जाऊन

सत्याची अनुभूती घ्यावी

एकांतामध्ये राहून

मृदू असावे हृदयामधूनी

दिसू कुणा न द्यावे

स्पष्ट बोलूनी कपटींना

स्थान त्यांचे दावावे

वाईट अनुभव येणे चांगले

अनिष्ट मुळीच नसते

भविष्यात येणारे संकट

त्यांच्यामुळेच तर फसते

✒️ K. Satish

पाऊल प्रगतीचे

कपटी, खोटे हितचिंतक

दूर जाऊ लागले

तेव्हा पाऊल प्रगतीचे

जोरात पडू लागले

लूट करूनी स्वार्थ साधला

बदनामीचा डाव तो रचला

माझ्या धनावरीच हो त्यांनी

नित्य चंग बांधला

कावा समजता दूर जाहलो

कोडे सुटू लागले

तेव्हा पाऊल प्रगतीचे

जोरात पडू लागले

स्वार्थ साधण्या जवळ ते येती

परंतु नित्य षडयंत्र ते रचती

समजून नाही येत तुम्हाला

कारण तुमच्या जवळ ते असती

अचानक त्यांचे खरे रूप

सामोरी येऊ लागले

तेव्हा पाऊल प्रगतीचे

जोरात पडू लागले

खोटे ऐकून तुम्हास छळती

खरे म्हणूनी खोटे पेरती

समाजातल्या नीच जनांची

झाली ओळख आता पुरती

नीट ओळखूनी आयुष्यातूनी

त्यांना दूर सारले

तेव्हा पाऊल प्रगतीचे

जोरात पडू लागले

प्रगती पाहून जवळ ते येतील

स्तुती पुन्हा ते करू लागतील

कठोर व्हावे तेव्हा मनाने

अन्यथा पुन्हा दगा ते करतील

त्यांच्यासाठी कठोर व्हावे

मनी जेव्हा कोरले

तेव्हा पाऊल प्रगतीचे

जोरात पडू लागले

✒️ K. Satish

सन्मानाची तुलना

पैशाशिवाय जरी हे

जग चालत नाही

तरी सन्मानाची तुलना

पैशाने होत नाही

कित्येक नादानांनी

पैशात तुलना केली

सदसद्विवेक बुद्धी

रसातळाला नेली

मोठ्या पदावर बसती

तरी थोडेही भान नाही

सन्मानाची तुलना

पैशाने होत नाही

अहंकार मोठा

पैशाचा माज खोटा

दुसऱ्याच्या जीवावरती

मोजती हे तर नोटा

रूबाब झाडण्याची

होते यांना घाई

सन्मानाची तुलना

पैशाने होत नाही

अकलेचे तारे हे तर

नित्य तोडतातं

समोरच्याला नेहमी हे

तुच्छ समजतातं

गुणांची कदर करण्याचे

भान यांना नाही

सन्मानाची तुलना

पैशाने होत नाही

जोवर पद आणि पैसा

तोवरच चाले माज

चित्र उद्या नसेल

जे चित्र आहे आज

चित्र पालटल्यावर

माज उतरून जाई

सन्मानाची तुलना

पैशाने होत नाही

✒️ K. Satish

भंगले की दुभंगले ?

प्रस्थापितांच्या लागून नादी
मित्राने मित्राची जात पाहिली
जीवाला जीव देणारी मैत्री
त्याच क्षणी बदनाम जाहली

आरक्षणाच्या गप्पा हा तर
नित्याचाच विषय जाहला
मित्राच्या ज्ञानाची स्तुती करणारा
आरक्षणावर टोमणे देऊ लागला

खोटी बदनामी पसरवण्याचा
विडाच त्यांनी उचलला आता
जातीवादी नेत्यांचे हस्तक
बनूनी राहिले कट्टर आता

खोटे मुखवटे चेहऱ्यावरचे
निखळून आता पडू लागले
जात धर्माच्या नित्य चर्चेने
मेंदू त्यांचे सडू लागले

गुन्हेगार की निर्दोष आता
जात पाहूनी ठरू लागले
विभागली ही जनता आता
असत्यही सत्य ठरू लागले

अचानक असे काय जाहले
धर्म जातीचे पेव हे फुटले
असत्य पसरले भरभर भरभर
सत्याने का डोळे मिटले ?

प्रत्येकाने करावे चिंतन
कोण फूट ही पाडत आहे
जिवाभावाच्या मित्रांनाही
आपापसांत लढवत आहे

एकजूट या देशामधली
संपू नये ही आशा आहे
जात धर्म न पाहता लढणे
हीच माझी अभिलाषा आहे

✒️ K. Satish

करू नका कावा - कराल माझा धावा

मुखवटे घालूनी माझ्यासमोर येती

समजले मला कोण षडयंत्र करती

लढा तो विचारांचा झेपत नाही म्हणूनी

खोट्या बदनामीचे हत्यार मग उपसती

चेहरे किती ते पडले प्रगती माझी पाहून

जंग जंग पछाडले विरूद्ध माझ्या जाऊन

फोडली कितीही जवळची माणसे तुम्ही

येते हो माझ्यासाठी सत्कर्म माझे धावून

गुलाम शिंकले तरी सन्मान त्यांचा करती

स्वाभिमानी जिंकता मना यातना होती

भीती किती ती वाटे चुकीच्या कर्माची

सामान्य माणसाला का हो घाबरती

मी नाही त्यातली कडी लावा आतली

अवस्था ही तुमची अशी कशी हो झाली

बडेजाव मोठा काय अर्थ त्याला

संपविण्यासाठी मजला किती षडयंत्र केली

इतके करण्यापेक्षा मन शुद्ध तुमचे ठेवा

क्रांतिकारी आहे मी करू नका कावा

आयुष्य आहे थोडे जगेन स्वाभिमानी

एक दिवस येईल कराल माझा धावा

 

घावं सोसण्याची ताकद माझ्यातं आहे

षडयंत्र हेरण्याचे कसब जाणिले आहे

दुष्कर्मफळे तुमची तुम्हास मिळण्याची

आतुरतेने आता मी वाट पाहत आहे

✒️ K. Satish

खरी नाती - खरी दोस्ती

सशाच्या गतीने होता प्रगती

चिकटून बसती स्वार्थी नाती

मैत्रीच्या मुखवट्याखाली

दडून असते कपटी दोस्ती

खोटी वाहवा स्वार्थासाठी

वाईट घडण्याची प्रतिक्षा मोठी

ठेवून अंधारात तुम्हाला

बदनामी पसरवती खोटी

समाजातही अनेक नमुने

हेच हवे असते त्यांनाही

खोट्यालाही खरे मानूनी

तुम्हास दोषी म्हणूनी पाही

स्वभाव तुमचा सरळ अन् साधा

कपट तुम्हाला उमजत नाही

स्पष्ट सडेतोड भुमिकेमुळे

विरोधक तुम्हाला पाण्यात पाही

नियत असता स्वच्छ हो तुमची

रचते खेळी अशी नियती

घटना घडवती निरनिराळ्या

दूर जाती मग कपटी नाती

पुन्हा नव्याने कासवगतीने

प्रगतीपथावर पाऊल पडते

चांगले वाईट उमजूनी येते

आयुष्य तुम्हास असे घडवते

आनंदात होते आनंदी

दुःखात तुमच्या जे हिरमुसती

अशीच नाती मानावी आपुली

तिलाच मानावे खरी दोस्ती

✒️ K. Satish

निरागस भेट

पाहुणे आले घरात

आले छोटे छोटे बाळ

बाळासंगे जुळली आमची

सुंदररितीने नाळ

सुंदर होती कांती तिची अन्

सुंदर होते हसणे

निरागस त्या बाळाला

नव्हते माहित रूसणे

तहानभूक आम्ही हरलो

विसरुन गेलो धकाधकीला

खेळवून बाळाला

झाला हर्षानंद मनाला

परतून जाताना

बाळालाही रडू त्या आले

राहायचे होते अजून त्याला

असे वाटू लागले

भेट कधी होणार पुन्हा

मना लागली आस

आजचा दिवस आमच्यासाठी

बनून गेला खास

✒ K. Satish

हो...मी विद्रोही

 म्हणते कोणी विद्रोही मजला

म्हणते कोणी वेडा

मुखात कटू पण सत्य बोलतो

जसा औषधी काढा

इथे नित्य स्तुतीची आस

मोठेपणाचा सर्वांना ध्यास

पचेल कैसे कडवे बोल हे

म्हणूनच माझा साऱ्यांना त्रास

सत्तेला मी जाब विचारतो

प्रस्थापितांशी निर्भीड भिडतो

नियंत्रणात ना येतो त्यांच्या

म्हणूनच त्यांचा दुश्मन ठरतो

सामाजिक न्यायासाठी अन्

अन्यायाला गाडण्यासाठी

सदा राहतो मी कार्यरत

जनजागृती करण्यासाठी

पचत नाही हे धनदांडग्यांना

चिखलफेक माझ्यावर करती

बदनामी माझी करण्याला

षडयंत्र ते नित्य हो रचती

पडत नाही हो फरक मलाही

जगणे माझे असे स्वाभिमानी

रचा कितीही तुम्ही षडयंत्र

तुमची नियतच असे बेईमानी

धोरणे माझी पक्की आहे

सत्यवदनाला नाही डरावे

अन्यायाचा परीघ मोठा

तरीही त्याला पुरून उरावे

✒ K. Satish